Do 2 ó 4 de maio celébrase na Praza da Vila a oitava edición da Feira de Turismo do Eixo Atlántico, na que participarán case unha trintena de concellos e entidades de Galicia e Norte de Portugal.

A feira contará con visitas guiadas, catas de viños, concertos, exposicións e obradoiros durante a primeira fin de semana de maio. Expocidades abrirá o venres 2 de maio coa actuación da Banda de Música de Sarria. Nesta primeira xornada tamén haberá unha exposición dedicada ós carteis publicitarios de Matías López, pioneiro do marketing e recoñecido chocolatero de Sarria, para conmemorar o 200 aniversario do seu nacemento.

Como é habitual, Expocidades ofrecerá varias actividades que os concellos e entidades participantes achegarán a Sarria, como degustacións enogastronómicas, obradoiros, artesanía en directo, etc. Sarria tamén ten preparado un amplo programa para amenizar toda a fin de semana do 2 ó 4 de maio. Cada xornada estará dedicada a un espazo territorial no que se sitúa o Eixo: venres a Galicia, sábado a Europa, e domingo a Portugal.

Ademais do acto de inauguración coa Banda de Música de Sarria, ofreceranse tres visitas guiadas ó longo da fin de semana. Estas visitas percorrerán o Camiño Francés, as antigüidades, e a figura de Matías López, e estarán dirixidos por expertos locais como Silvia Mondelo. O sábado 3 de maio os visitantes poderán participar nunha degustación exclusiva de viños galegos e portugueses, con viticultores de ambas as comarcas, nun acto para un reducido grupo de 100 persoas.

Para os máis pequenos haberá obradoiros de chocolate, maxia e elaboración de instrumentos con elementos naturais, mentres que os maiores poderán gozar dun obradoiro de baile tradicional galego. A música será outro dos principais atractivos de Expocidades, con concertos de diversos xéneros, entre os que destacan unha homenaxe a ABBA, a banda local Louband, ou o grupo sarrián Clarisaxos, que pechará a feira. Ademais, o domingo estará dedicado a Portugal, cunha sesión vermú de fado a cargo de Iria Estévez.

Durante a fin de semana do 2 ó 4 de maio, Sarria tamén contará con actividades deportivas, como a carreira de obstáculos da Pretoriana Race, que atraerá a deportistas de toda a comarca, e un rally de coches clásicos organizado polo club Clásic@s Sarria.

Expocidades é un evento organizado pola comarca do Eixo Atlántico que promove o turismo local e o intercambio cultural entre Galicia e o norte de Portugal. Durante todo o evento, os visitantes poderán explorar a riqueza cultural, histórica e culinaria dos concellos do Eixo Atlántico, unindo as dúas comarcas nun espazo de intercambio e desfrute.