A igrexa prerrománica de Santa Eufemia de Ambía está catalogada como Ben de Interese Cultural, e foi declarada Monumento Histórico-Artístico en 1931. Reflicte unha gran influencia mozárabe e garda unha estreita relación coas igrexas de Santa Comba de Bande e San Miguel de Celanova, xa que a súa actividade foi promovida polo Mosteiro de Celanova.

A súa estrutura consta dunha soa nave rectangular, aínda que no seu día puido ter tres naves separadas por arcos. Posúe tres capelas, que antes estaban separadas por arcos de ferradura, dos que hoxe só quedan algúns restos, dous altares romanos e unha talla medieval de madeira dun Cristo crucificado.

No exterior atopamos a chamada “Fonte das Ninfas” onde antes se atopaban os altares romanos, que hoxe se atopan no interior do templo.