O Mosteiro de San Clodio foi declarado, xunto coa ponte do mesmo nome, Monumento Histórico-Artístico Nacional en 1931. A súa orixe non está totalmente clara. Algunhas fontes sitúano no século VI. Para outros estudosos, como Sandoval e Yepes, foi fundada no ano 928. Nun principio estivo a disposición dos monxes negros da orde de San Bieito, que a converteron nun próspero centro agrícola. A partir del introduciuse o cultivo da vide nesta zona. Desde 1225 ata a exclaustración foi cisterciense, e de novo beneditino desde finais do século XIX.
Na fachada do mosteiro pódese ver a cruz de Caravaca coñecida como a “Divina Reliquia”, venerada polos veciños para liberar as vides da sarabia.

A igrexa do mosteiro, que leva o nome de Santa María, é de estilo gótico e presenta tres ábsidas correspondentes ás naves. A imaxe da virxe ocupa o retablo maior rodeada de santos das ordes que nalgún momento ocuparon o mosteiro. Destaca a fachada barroca do antigo pazo abacial. Hoxe o antigo mosteiro, tras un proceso de restauración, foi convertido en Hotel Monacal. Entrando pola recepción pódese acceder aos dous claustros.