O 2 de xullo de 1921 a Corporación Municipal acordou a construción dun parque. Nace como o primeiro gran parque de Lugo aberto a todas as idades e todas as clases sociais.

O proxecto inicial, do arquitecto municipal Ramiro Sainz Martínez, dividiuse en dous trazados, o da meseta, na parte máis alta e próxima á vila, e o da parte accidentada, que coñecemos como “Costas do Parque”. Reiniciaron as obras para rematar o parque en 1927 co arquitecto municipal Eloy Maquieira, quen proxecta o muro de contención e petril, a pérgola, o quiosco e a escaleira.

O espazo tardou nove anos en completarse. Nunca se inaugurou e, aínda que nun principio foi designado como Parque Alfonso XIII, tras a constitución da II República, a Corporación Municipal acordou poñerlle o nome de Parque Rosalía de Castro.

Hoxe en día segue a ser un enclave simbólico e máxico para a cidadanía, cun gran patrimonio, riqueza histórica e natural.